ماہنامہ کمپیوٹنگ

ماہنامہ ”کمپیوٹنگ“ آئی ٹی کے حوالے سے پاکستان کا واحد مستند اُردو جریدہ ہے، جس میں عہدِ حاضر کی جدید ترین ٹیکنالوجی پر علمی اور تحقیقی مضامین شاملِ اشاعت ہوتے ہیں۔ گو اس وقت کمپیوٹر کے حوالے سے چند اور جرائد بھی مارکیٹ میں موجود ہیں لیکن شومئی قسمت کہ وہ آئی ٹی اور کمپیوٹر کے سیر حاصل مواد سے خالی نظر آتے ہیں۔ ماہنامہ ”کمپیوٹنگ“ اس زاویے سے یقیناً پاکستان کا واحد علمی جریدہ ہے جس میں کمپیوٹر اور اس سے وابستہ، دنیا بھر کی تمام جدید ترین معلومات، آرٹیکلز اور تصاویر موجود ہیں۔
ماہنامہ ”کمپیوٹنگ“ کی ایک بڑی خوبی یہ بھی ہے کہ یہ قومی زبان میں شائع کیا جا رہا ہے تاکہ کمپیوٹر کی تعلیم کا ابلاغ ہر طبقہ فکر میں عام ہو سکے۔
ISSN کا حامل یہ جریدہ اپنے موضوع اور مواد کے اعتبار سے آئی ٹی کے طالب علموں کے لیے گائیڈ کا کام کر رہا ہے اور اس کی تدوین میں شامل پوری ٹیم اپنے شعبوں میں ماہرین تصور کی جاتی ہے۔

ماہنامہ کمپیوٹنگ اپنے گزشتہ شماروں میں کمپیوٹر اور انٹرنیٹ کے سینکڑوں مختلف موضوعات پر مضامین شائع کرچکا ہے۔ ان میں کمپیوٹر سائنس کے دقیق موضوعات کے ساتھ ساتھ عام قارئین کے روز مرہ امور میں کام آنے والی تحریریں بھی شامل ہیں۔ کمپیوٹنگ کا ایک امتیاز یہ بھی ہے کہ اس میں شائع ہونے والی تحریریں اس طرح مرتب کی جاتی ہیں کہ وہ عام قاری کے لئے قابل فہم ہوں۔ نیز، یہ کوشش بھی کی جاتی ہے کہ پورے شمارے پر ایک ہی موضوع کی چھاپ نہ لگے۔ اس لئے ہر ماہ نت نئے موضوعات اور عنوانات کے ساتھ دلچسپ تحریریں شائع کی جاتی ہیں۔